方力申（小方）、蔡卓妍（Sa）、馬詩慧和囝囝以及Cara G.昨晚出席眼鏡活動。剛與鄧麗欣（Stephy）分手的小方，心情看似比前平復，他透露活動完後，一家人會到餐廳和媽媽慶祝生日。
談到Stephy日前在機場提到分手事時兩度落淚，小方坦言有看過報道。對於會否和Stephy復合，他與前度女友口徑一致，表示任何事情都有可能發生。他說：「之前講過公開分手係要諗清楚，唔係兒戲，十年感情都好長，將來嘅嘢將來先算。」對於粉絲早前聯署白宮要求二人復合，他表示亦有所聞。他說：「我知呀，其實好難可以完全唔諗，因為太多嘢黐埋一齊，好似社交圈打我個名都會出現佢（Stephy）個名，好難可以分得開。唔係講緊讀書嘅學生咁，話唔見就唔見，我哋暫時揀唔同方向，兩個都覺得可惜。」

唔信Stephy轉性向

對於Stephy轉性向戀鄧衍敏（小牛），小方就話打死唔信。他說：「我唔識佢（小牛），不過我梗係唔信啦，咁咪即係話我唔夠吸引力？」問他小牛早前在社交網貼與Stephy的合照，再寫上「細水長流」，對此他說：「唔知，唔答！」對於日前本報讀者「爆相爆片」拍到他到跑馬地買酒借酒澆愁，他笑言：「兩支？太睇少我啦，嗰日我哋一班人食飯，其實都好慘，之前去黃大仙打波，又話我去求籤。」問到同場的阿Sa有否安慰小方，她坦言：「兩個人之間嘅嘢，旁觀者最好唔好插嘴，要等時間過就會好啲。」
採訪：羅慧敏
攝影：陳慧安