美國《紐約時報》早前刊出青年新政游蕙禎嘅文章，游喺文中講明，香港獨立係唯一出路，一眾「藍絲」毫不意外立即口誅筆伐，身為資深大律師嘅行政會議成員湯家驊則喺facebook話，「感到遺憾和憤怒」，點解會嬲嬲豬？湯狀自爆，原來佢同前律政司司長袁國強多次投稿畀《紐時》，但全數被拒。

是咁的，湯狀一嚟就話《紐時》係「一份頗為奇怪的報紙」，因為佢同袁國強多次就法治、憲法同埋法庭判決問題寫文，但係《紐時》全數拒絕刊登，就算用「讀者來函」方式都唔得，但與此同時，湯狀覺得《紐時》對港獨、破壞法治嘅文章就照單全收，搞到特區喺國際淨係被偏頗言論抹黑，所以佢好遺憾同憤怒。

其實湯狀唔獲《紐時》登文，又有乜好奇怪喎？唔投《紐時》咪投去《環時》咯，唔通游蕙禎投唔到稿去《環時》，又會覺得《環時》頗為奇怪？

立會補選新聞，《蘋果》一網睇晒
http://bit.ly/appledaily1125