三司十二局人選半新不舊，加上煲呔心戰室一早放定風，就算土共親手栽培、根正苗紅者入局，外界都唔覺得好震撼，反而有啲多年嚟冇乜建樹者，竟然有得留低仲篤眼篤鼻。相信唔使八方多講，大家都知係乜水，係，就係被稱為林D9嘅候任政制及內地事務局局長林瑞麟。
林D9係前朝老董當家時上位，做過新聞統籌專員，初時係威係勢，話要學白宮發言人每周例行發布會咁搞新聞公關喎，結果搞咗乜出嚟，大家都冇眼睇，因為冇乜成果獻世；之後佢轉搞政制事務，官佢就升咗，香港政制就笨豬跳。林D9冇做好份工，市民睇得好清楚，所以佢民望長期不振低位徘徊，02年底起跌穿50分合格線，最低係03年7月跌到唔夠40分，之後一直潛水，係民望最低局長，至今年初先至升返上50分僅僅合格。

人貴自知，如果喺其他有真正民主嘅地方，民望唔合格官員早就自己起身，唔使等人踢落台啦，香港問責官員卻可以賴死唔走。噚日有記者問林D9，民望咁低點解仲好意思留低，佢死撐話近排自己民望有啲改善，仲自己讚自己有啲進步，八方聽到，當堂打冷震。
林D9又無厘頭咁話，自己嚟政府總部係返工而唔係選美，八方睇住佢個樣，笑咗出嚟，覺得佢都真係自信心爆棚。如果林D9去選美，八方就肯定頒個「香港無厘頭小姐」同「國際偽善小姐」獎畀佢，等佢民望咁低，都可以當選得實至名歸。

雖則佢話自己唔係選美佳麗，但又拉埋其他議員落水比較喎，佢寸寸嘴咁指好多民主派議員民望都好低，未必高得過問責官員。呢層唔使你講啦，八方同好多市民都知，唔知林D9想同邊個議員比較啫。八方搵番條數出嚟睇，佢民望好過長毛、高過卿姐少少，同馬丁平排，同余若薇61.1分比嘅話，輸成條街有多。
好多人對林D9個樣同講嘅嘢已經睇到悶聽到厭，所以佢噚日一開口講嘢，全場記者即刻自動「熄機」小息，等佢吐完一堆有聲音但冇意義嘅嘢後先提問。老實講，市民唔聽佢講乜絕對冇損失。噚日記者會，《蘋果》記者都懷疑受到不公平對待，只得一個記者被點中提問，反而今日休息唔出版嘅報紙就頻頻被點中。新人事，舊作風，始終如一。