【做埋老闆】學紅魔92班 夏神同丹巴巴亞北美有隊波
車路士曼聯夏薩特丹巴巴亞卡比耶聖地牙哥北美聯賽蘇維
正喺車路士養傷中嘅比利時翼鋒夏薩特,同藍軍舊隊友丹巴巴亞及另一位英超戰將、前里爾隊友卡比耶之間老友鬼鬼,最近佢哋三個就搵埋丹巴巴亞嘅塞內加爾國家隊隊友、費倫巴治「倒掛王」蘇維,四個人一齊注資一間喺美國成立嘅新球會,齊齊做班主,就好似曼聯92班之前投資沙福特城一樣。
其實幾個月前,已傳過佢哋四位想入股呢間位於美國聖地牙哥嘅新球會,但當時間球會仲未攞到經營權,而最近牌照終於通過,但大家唔好誤會佢哋即將係美職聯班主,因為呢間球會申請踢嘅係北美聯賽,即係魯爾前球會紐約宇宙隊踢嗰個聯賽。
夏神同丹巴巴亞都喺自己Twitter分享喜訊,上載埋新球會段宣傳片,但呢段片就只得巴亞一人,帶住個足球走遍成個聖地牙哥,段片大概分零鐘。雖然四位班主tag住聖地牙哥NASL(San Diego NASL),以及呢間球會新開嘅Twitter帳戶,亦係用咗呢個名,但據聞只係暫時性,官方名未落實。