「超人」李嘉誠最近畀唔少驚訝同驚喜大家，佢旗下4間主要上市公司罕有地準備同日（本月16日）公佈業績之外，佢頭馬、即打工皇帝霍建寧又話本周四出席AlipayHK「新零售新體驗」啟動禮。
須知道霍大班極低調，往年主要係業績會同股東會先至見到佢老人家，區區一瓣生意嘅記者會，竟然得佢大駕光臨，只可以話，超人真係好重視同阿里巴巴創辦人馬雲呢單合作囉。

馬雲派出井賢棟

AlipayHK合營公司係由馬雲旗下螞蟻金服同長和（001）分別出資50%成立，啟動禮當日，螞蟻金服派出總裁井賢棟（唔會係馬雲囉），作為半個主人家，長和派出聯席董事總經理級霍大班，按職銜都fair enough嘅。
兩間公司舊年9月出新聞稿宣佈呢項合作，霍大班喺新聞稿話過，長和旗下電訊、零售等網絡，結合螞蟻金服嘅科技，可以帶來龐大效益，可惜兩間公司未有詳細講解過呢個「強強合作」係點玩法，搞到長和即使有馬雲光環加持，股價都冇乜突破，霍大班呢次親身講兩句都應該嘅。
聽講呢個啟動禮舉行之前，會有預覽活動畀傳媒試用AlipayHK嘟嘢購物，霍大班如果現場示範，應該可以做埋生招牌呀。

李華華
mailto:[email protected]