台灣型男彭于晏自操得一身肌肉後，立即升格成為男神，而且之後喺多套電影中大派福利，貼身衫、半裸，任班「彭太太」睇到流晒口水同鼻血，而喺早前已上映嘅《邪不壓正》中，彭于晏有幾場全裸戲，當中包括喺預告片中已曝光、更成為熱話嘅全裸屋頂飛奔，有人質疑係替身上陣，姜文喺宣傳呢部戲時已經話下次連國旗都唔會俾彭于晏披，而彭于晏更霸氣話：「下次就拍正面吧！」

講還講，但想知都係想知嘅，到底彭于晏係咪真係全裸上陣呢？嗰場屋頂飛奔戲睇唔到正面，但原來有場彭于晏出浴戲，都係全裸上陣！

段短片近日喺網上曝光，嗰場戲係講彭于晏企喺度淋浴，然後側一側身，再戙起隻腳……雖然導演巧妙地用個人影遮咗彭于晏條股罅，但係喺側面睇，彭于晏真係全裸㗎！（其實正常嚟講，冇人會着住衫沖涼啩…？）彭于晏早前接受訪問時話自己都唔好意思講，叫觀眾自己入場睇（新聞連結： https://bit.ly/2x2wfVJ ），原本以為佢咩事咁怕醜，真相原來係咁……唔知班彭太太睇完有咩意見呢？

精選娛聞，喺晒《娛果》
http://fb.com/appledailyent