太極、RubberBand、胡琳、龍小菌隊帶菌者、ToNick，噚晚喺九展開騷，太極打頭陣兼壓軸，大家輪流crossover，唱出多首80年代歌曲，有草蜢、Beyond、Raidas、溫拿等嘅歌，現場好好氣氛，觀眾都起晒身一路聽歌一路跳。尾聲時，太極請咗B哥哥鍾鎮濤上台一齊Jam歌，B哥哥唱咗兩首歌至離場。而第一晚有份演出嘅kolor、秋紅都有返嚟一齊上台唱歌。

完騷之後，一眾樂隊弦樂手出席大會慶功宴，胡琳話第一次演Rock Show，好開心可以同太極同台：「睇佢哋表演就睇得多，冇諗過真係可以同台演出，佢哋搵我時，監製叫我搵衫要配合主題，要有rock味，可能我平時畀人形象太斯文。不過其實我扮之嘛，大家對我已經有固定嘅印象，佢哋都係鍾意我印象中嘅形象，其實每個人都有rock嘅一面，我都可以唱rock歌。」

同戴夢夢分手幾個月嘅太極鼓手朱翰博(Ricky)，完騷後即刻閃咗，太極成員第一句好認真話：「佢趕住去做嘢。」但之後又講笑話：「佢有新歡要搵嗰個女仔。我哋冇見過，所以佢咁快閃。」呢頭話有工作在身，但嗰頭雷有輝(Patrick)就幫佢兜：「佢新歡即係佢架新車，佢買咗新車，車即係女，泊喺停車場，梗要去睇吓有冇俾人揩花，新女梗係要摸吓鍊吓揸吓㗎啦！新車一定要揸，幾時輪到我哋揸呀!」

太極又講到請B哥哥上台唱歌：「其實佢(B哥)想嚟宣傳佢張發燒碟，好開心可以一齊夾band，同唔同樂隊一齊crossover，好好玩，佢哋都好叻好勁，尤其係ToNick。」