跑埋今日（24日）沙田賽事，蘇兆輝今季四個月客串期就結束，今次香港之旅真係大豐收，豪取四十多場頭馬，座騎贏取近6,800萬獎金，蘇兆輝分到當中逾600萬，真係令好多打工仔羨慕。

蘇兆輝嚟過香港客串幾次，記得2016至17年度季中客串嗰陣，佢因為工作壓力太大，有時夜晚失眠，朝早要狂隊幾杯咖啡才出席晨操。

今季蘇兆輝客串，太太正懷有第三胎，日前誕下蘇兆輝之家第三名兒子Harry。目前自己同家人分隔兩地，佢話今次嚟香港競爭依舊激烈，但壓力反而細咗，在晨操及賽馬日都多咗笑容。

呢位38歲英國冠軍騎師，經歷時間洗禮，似乎對人生有所頓悟，佢話學曉順其自然，時刻提醒自己，人生唔應該過份思考，如果唔係就會搞到有好多白頭髮，俗啲講即係唔好亂諗嘢過份憂慮，所以整個人都開心咗。

蘇兆輝今次客串期同苗禮德、羅富全合作成績最好，今日佢同苗廐冇合作，而羅富全繼續將「電玩皇者」、「繽紛遊戲」交給蘇兆輝策騎。

其中，第七場二班1600米九龍木球會百週年紀念盃的「繽紛遊戲」上仗克服14檔，拋甩對手贏2.5馬位，姿態頗為誇張。

此駒至今五戰四冠一亞，賽績優異，實力深不可測，今仗勢助蘇兆輝贏馬告別香江。

-----------------------------
《蘋果動新聞》訂閱新世代，4月開始免費訂閱，現在接受登記！
http://bit.ly/2Ja3IXw
-----------------------------
星期一至五晚上10點半
《動腦Q》Let's Q the money！
http://bit.ly/2QW8LcI