各位球迷唞咗一日，大家精神返啲未先？因為世界盃16強今晚嚟料喇！先嚟頭場晚上10點鐘將會上演16強最矚目一戰法國大戰阿根廷；而深夜2點鐘，就會上演另一場大戰烏拉圭鬥葡萄牙。今晚四場比賽，將會見到4位喺西甲呼風喚雨嘅射手，分別係法國嘅基沙文、阿根廷嘅美斯、烏拉圭嘅蘇亞雷斯，同埋葡萄牙嘅基斯坦奴朗拿度，真係聽到都覺得正。不過提示返，今晚兩場比賽免費台都係無直播，如果想睇就要嗱嗱聲衝去酒吧、k房、餐廳，或者商場喇！

*淘汰賽90分鐘賽事打和，將會進入加時30分鐘，不設黃金入球與及銀球制，加時賽和的話將進入互射12碼分勝負。

22:00 法國vs阿根廷 now618台直播
球場：喀山體育場
天氣：16-28度，天晴
法國上場悶和丹麥，表現受國內傳媒同名宿大肆抨擊，今屆法國雖然未失過波，但入波亦唔係多，唔計澳洲擺烏龍，全隊3場只係射入2球，以法國嘅鋒線絕對唔合格，而今場傳媒估計會排出同對秘魯一仗一樣嘅正選陣容；阿根廷上仗成功絕地反擊，無論對軍心士氣都有正面影響，森柏奧利否認換人之前要徵詢美斯嘅意見，今場估計會排出類近4-4-2或4-3-3嘅陣式。

02:00 烏拉圭vs葡萄牙 now618台直播
球場：索契費舒特奧運球場
天氣：23-27度，有雨
烏拉圭今屆世畀盃仍然一球未失，而最後一場對俄羅斯嘅分組賽更加見到球隊攻力不俗，預計正選仍然係卡雲尼同阿蘇聯手攻堅，後防以高甸，荷西基文尼斯，同埋門將梅斯利拿組成鐵三角，大戰C朗；葡萄牙方面，教練費蘭特山度士對於球隊中場控制力仍然不滿，今場要面對中場非常硬淨的烏拉圭，實屬惡戰一場。

--------------------
一網睇盡
足動世盃 直擊俄國最前線 https://hk.feature.appledaily.com/worldcup2018/
--------------------
《體蘋果》陪你睇波講波
https://www.fb.com/appledailysports
--------------------
迎戰決賽周！《BFB CHAMPIONS 2.0》登入免費送連抽，超級球星立即入隊！ http://bit.ly/2xrTKGM