由李昇基、車勝元、吳漣序等人主演嘅tvN新劇《和遊記》去年12月23號首播後是非不斷，當中包括出現災難性嘅穿崩鏡頭外，之後劇組被爆涉隱瞞工作人員A某墮地受傷一事，令到韓國僱傭勞動部及警方亦介入調查，及後再爆出拍攝現場出意外，令劇集多災多難，一度陷停播危機。

而本周日(4日)《和遊記》已迎來大結局，雖然已播出結局，但是非繼續纏身，根據今日韓媒就報道，因為之前嘅墮地事故，片場嘅三名負責人包括美術導演、製作公司嘅工作人員等已被移送到檢察院，並以涉嫌業務過失致人受傷之嫌作出起訴。
　　
另外，李昇基近日接受訪問時就提到自己應該唔會再回歸綜藝節目《新西遊記》，李昇基於2015年時演出節目，並作為元祖成員，不過因為之後入伍就退出節目，粉絲一直都期待李昇基退伍後回歸節目，李昇基受訪時亦直認對《新西遊記》有好深感情，但因為佢冇收到再次演出嘅邀請，不過直認如收到邀請一定會認真考慮，亦唔會第一時間就答應，佢話因為節目已做咗四季，已經有一定嘅風格，突然再加插佢入節目，未必會有好效果。

更多韓流，喺晒《娛果》
http://fb.com/appledailyent