唯一麵家目前有三間店,分別在荃灣、葵芳及沙田,其中沙田店15年前選址沙田廣場營業至今。負責樓面的老臣子陳小姐表示,在沙田唯一工作15年,「由佢開業做到𠵱家,好有感情,老闆對員工又好好,結業十分可惜」。她說,該店去年5月才花了200萬元裝修,想不到經營年多本月31日租約期滿後結束,「啲熟客知道咗都話好可惜,唔知去邊度食飯好」。
據了解,商場大幅加租五成,令麵家老闆無奈結束沙田分店,傳聞承租是大型電器連鎖店。街坊余先生表示,每星期都光顧唯一麵家,喜歡其湯麵,「知道唯一結業日前向老闆查詢,老闆話如果月租加多10萬蚊都會繼續做落去,換言之,加租金額唔止呢個數」。他說,沙田商場變化好大,商舖全由大型連鎖店壟斷,「小店執得一間又一間,好似沙田廣場以前有齋舖、茶餐廳都冇晒,𠵱家連唯一一間嘅小店『唯一』都執埋」。