當年今日
關於我們

國際網絡:捱過大鑊嘢美經濟撐得住

蘋果日報 2007/07/05 00:00


國際貨幣基金組織(IMF)6月發表咗一份報告,內容係話美國經濟最終應該會軟着陸,但可唔可以實現就存在唔少風險。
報告仲呼籲當地政府採取有效措施穩定經濟發展,例如提高國內儲蓄水平,降低預算及貿易赤字等,仲要抵制貿易保護主義傾向。到底美國人又點睇明年嘅經濟前景?
《華爾街日報》網上版進行嘅調查發現,有份投票嘅950名網民中,55%對美國未來經濟表現樂觀,其餘45%則表示悲觀。
網友checkmate2認為08年大選前,一定會有人粉飾太平,所以經濟表現點都唔會差得去邊。atoly就話:「美國經濟經歷911事件、颶風、油價飆升咁多大鑊嘢都撐得住,加息、地產唔掂呢啲問題,應該捱得過!」
不過,亦有網友對經濟前景悲觀,好似從事家居用品生意嘅retlawxela就話,從客人消費情況睇,未來經濟似乎唔多掂,「以前啲客會為咗換飛行哩數碌卡買嘢,𠵱家真係為咗買嘢而碌卡;以前客人用舊咗啲家居用品,就會嚟買過新嘅,𠵱家會叫我哋去佢屋企將啲舊家居用品翻新。」
crodby亦認為:「美國樓市仲係咁淡,好多人都擔心次級按揭問題惡化會衝擊金融市場,加上能源價格高企打擊消費者開支,市場有咁多隱憂,我唔覺得未來經濟會有幾好囉!」