鄭希怡（Yumiko）帶囡囡梁浸浸拍大陸真人騷節目《不可思議的媽媽》，節目剛播出第一集，只得2歲半嘅梁浸浸喊唔停，又不停要媽媽抱抱，Yumiko放囡囡落床時，掛住玩手機嘅梁浸浸一個唔小心，倒樹舂雙腳朝天跌落地，嚇到Yumiko即時捉住囡囡，好在冇事咋。

期間梁浸浸有少少發燒，但又唔肯探熱，一手撥開支探熱針時，手仔不慎打中媽咪隻眼，Yumiko被激到忟憎說：「……點解你咁曳㗎啫？」有報道就話Yumiko爆粗鬧囡囡！Yumiko接受《蘋果》電話訪問否認：「首先，我冇講粗口！我同佢一齊去咗一個新嘅環境，第一日大家都有啲唔係好習慣，我用咗好多方法安撫佢，但都唔係好見效，自己都好焦慮，平時去旅行有老公可以幫吓我。喺成個過程之中，我都學習咗好多嘢，其他媽媽都有教我湊小朋友嘅唔同方法，你睇吓啦，之後會越嚟越好。」

Yumiko喺節目上講到感受時，都喊住自責：「今天是我第一次自己一個人帶梁浸浸同學，我從來沒有感受過她那麼需要我，要一直掛在我的身上不肯下地，有時候覺得好像自己還不夠耐心，特別想哭的時候是，她哭着跟我說想回家...我本來就不是一個很有耐心的人，她哭到後來，我自己也煩躁了，我覺得你怎麼那麼不聽話，她一直說要回家，所以我當時就覺得，那應該是我給不了她家的感覺！」