四川成渝（107）不單止最平，兼有港滬通A、H股折讓嘅concept。又阿爺大搞國企「混合所有制」，成渝對口係四川省國資委，搞注資，成渝一樣都會有機會。
目前，集團H股市值先得20億銀，單係呢個point，中線就好爆炸。
而市場專業評估，成渝本年度預測PE 5.3倍，集團家陣PB得0.5倍。江蘇寧滬（177）今年PE同最新PB，分別係12.8倍及1.8倍、深高速（548）7.2倍及0.63倍、浙江滬杭甬（576）12.4倍及1.4倍，安徽皖通（995）6.9倍及0.77倍。講PE、PB，成渝平通街。

又成渝香江H股相對本身上海A股折讓34%，又係國企公路股當中，A、H股折讓最大一隻，炒港滬通，亦掂。
據成渝嘅網站介紹，集團要着力打造橋路、城管、工程建設、能源文化，同金融投資五大版塊，兼力爭2015年利潤20億銀人仔（係去年純利翻一番）。睇到成渝未來發展，唔再係「公路股」呢個框框；又老老實實，單靠目前主要公路業務，成渝肯定達唔到標。
其中較有可能係，成渝獲得阿媽上邊五大範疇嘅優質注資。而阿爺積極推動「混合所有制」，可以透過注資形式，實現資產資本化，加埋成渝牌頭背景，注資chance面好大。而成渝阿媽四川省交通投資，總資產值高達2,050億銀人仔，成渝H股市值，先講得20億港銀，真係好有遐想。
買成渝，追上A股股價（折約3.54港銀），現價（2.31元）要翻半番，追上行家平均1.15倍PB，係要升95%到4.50元。又成渝若果有注資，加埋1997、2007年國企熱翻版一旦撻着，成渝肯定放紙鳶，中線唔設目標上限。

錢雋
細價股專家
本欄逢周二、三、五刊出