華納唱片有限公司日前入稟高院，控告種星堂娛樂有限公司，指雙方喺2014年6月6日簽下合作協議，同時任藝人連詩雅嘅經理人，華納指種星堂及後終止同華納合作，實屬違約，要求法庭頒令索償，同追討合約欠下華納嘅所有款項。(新聞連結： http://bit.ly/2sm0pz2 )

今日連詩雅出席手機發佈會時，獲大會安排驚喜送上生日蛋糕，兩個師妹黎紀君同梁諾妍錫錫。講到最近嘅合約糾紛，佢透露以自己所知，合約已經完咗，其他嘅嘢就交返俾公司(種星堂)。問佢有冇影響心情，佢話：「都ok呀，始終keep住有其他工作，嚟緊有個大project籌備緊，都忙緊宣傳同訪問。」問到係咪同周柏豪合作，佢答：「唔係，係公司其他artists，遲啲就會公開啦。」

對於約滿就同舊公司決裂，連詩雅就話有好多嘢唔方便講，其他事都交俾律師處理，不過佢就話私底下都會同舊同事有傾有講，畢竟相處咗咁多年。佢形容o依家心情係「開心、充實。」