劉嘉玲上月終於同拍拖20年嘅梁朝偉結婚，喺印度度蜜月過後，嘉玲馬不停蹄飛咗去北京做嘢，不過佢日前接受吳君如主持嘅商台節目《嘩!嘩!嘩!打到嚟!2008》訪問，大講同偉仔相處嘅點滴，又大爆偉仔過去其實曾多次求婚。
整個訪問都表現得如沐春風嘅嘉玲，被君如問到偉仔當日係點樣求婚，嘉玲話：「其實偉仔熱戀時經常求婚。」但由於當時嘉玲仲未ready，所以一直都對結婚模稜兩可，直至出事後，偉仔再次同佢求婚，令嘉玲相當感動並憶述話：「佢同我講：『不如我哋結婚啦，我哋不如唔好再做呢行，一齊離開呢度啦』。」不過當時嘉玲覺得應該要面對現實，所以決定繼續留低。

青霞婚禮上心醉

提到結婚地點，嘉玲話今次婚禮選擇喺不丹舉行係緣份所致，當佢向偉仔提議時，偉仔都相當震撼，又將婚禮事宜全程交畀嘉玲負責。
講到結婚當晚情況，嘉玲指林青霞係咁多嘉賓入面最開心嘅一個，而且係最快醉倒，不過係心醉而唔係酒醉，嘉玲自己就整晚保持清醒，佢話：「因為我要記低當晚每一個片段，等第時可以回味。」
至於整個婚禮係咪如傳聞中花咗5千萬，嘉玲話遠低過呢個數目，但就強調婚禮呢個難忘回憶同朋友嘅祝福，已令佢覺得得到好多。