記性好嘅讀者，一定仲記得廣州人喺上年發動過一場轟轟烈烈嘅「撐粵語」抗爭。當日數以千計嘅廣州人齊齊上街高唱《光輝歲月》，團結一心大叫「丟那媽」，真係何其壯觀呀！其實要捍衞自己嘅文化同語言，係要持之以恒，無時無刻都keep住抗爭。

八方近排睇到一份《羊城晚報》，一望到條A1大題，就覺得相當驚喜，因為呢份喺8月9日出版嘅報紙，頭版報道美股大跌嘅標題，竟然係〈美國股市跌到阿媽都唔識〉。
呢個標題咁爆，網民好評如潮，有網民大讚「《羊城晚報》你太犀利了！將粵語發揚光大」；內地網民都話呢個標題夠地道，直情係「勁到阿媽都唔識」呀。有網民亦精益求精，話條題應該係「跌到阿媽都唔認得」，咁先夠傳神，質疑編輯係咪因為唔夠位而減縮？如果有香港報紙夠膽起呢一種別樹一格嘅標題，同時想配合番香港嘅潮流，大概可以將條題起做「美股金翅仆街鳥」；神獸咗嘅標題，大家like唔like呢？