煲呔今日起上京述職三日。上星期佢嘅民望跌到歷嚟最低位，但之後狀況回勇，日日趕幾場係咁蒲頭；股市回穩，工展會又好似因為佢帶頭消費咁，人人去親都爭住使錢買嘢。八方諗落都有啲奇怪，好多人都當煲呔政府係跛腳鴨，平日得閒無事都會砌兩嘢，但呢幾日情況好似唔同咗……裁員消息少咗，油公司減價，超人宣佈減電費，大家又掛住睇亞視鬧劇，連鬧政府鋪癮都收埋。

卿姐心情最靚

出現呢個咁難得嘅機遇，煲呔噚晚就重拾放低咗兩年嘅一段舊情，翻啅民主黨！舊情復熾嘅地點揀喺鯉魚門，一來係李華明地頭，食海鮮唔會俾人斬到一頸血，二來煲呔早前都藉買老婆餅探過路，有乜依郁要較腳都識得揀路走。
八方現場所見，黨主席何俊仁同新任副主席卿姐最早到場。卿姐表現最興奮，笑容亦都最燦爛，佢一向同煲呔鬧交多過傾偈，𠵱家一齊撐枱腳食海鮮咁溫馨就更加罕見，不過卿姐話其實唔係好「恨」同煲呔食飯，比較起嚟佢更加「恨」攞番本回鄉證。而煲呔就同大內總管攞命陳兩人赴會，加埋民主黨立法會議員一枱11人𡁻鮑魚海鮮，由民主黨請客，埋單6,000蚊。
煲呔當年因為政改方案俾泛民否決，搞到雙方關係係咁先，跟住煲呔講到明親疏有別，加上政府施政一單接一單被各界炮轟，連保皇黨都對佢唔客氣係咁狂插，一副眾叛親離咁款，翻啅民主黨都係冇得選擇嘅選擇。據說飯局上傾過領匯，同近日人人關注嘅亞視高層人事變動問題，聽講氣氛融洽冇出現嘈交喎。
難得煲呔出現，鯉魚門一個海鮮舖員工北叔成功攔途申訴，話嗰度有個公眾碼頭俾人霸佔咗。煲呔跟住北叔去睇咗一陣，仲答應會幫手跟進，證明佢已經覺得民望其實唔係浮雲咁簡單。

阿爺棒打鴛鴦

呢次短敍10點就拜拜，事關煲呔話要執行李今日上京。照睇佢會同阿爺講明同民主黨嘅關係，但煲呔係個聽話嘅醒目仔，如果阿爺叫佢飛起民主派錫番保皇黨，你估佢會唔會照做？況且今次述職，預咗中央會有好嘢益佢，乜嘢新歡舊愛都放埋一邊先啦。

mailto:[email protected]