曼聯中場費蘭尼忽然畀疑似係前隊友朗尼嘅偷食對象拖落水，佢透露自己已經搵咗律師，準備對有關佢嘅「不實報道」採取法律行動。

今季由曼聯回歸咗愛華頓嘅朗尼，早前因為醉駕被捕，佢架車上面就有個叫做Laura Simpson嘅單親媽媽，朗尼疑似偷食搞到當時同幾個仔度緊假嘅老婆高蓮即刻返英國，仲傳佢要同「月巴」離婚㖭。點知講講吓，英國幾份小報又報道Laura Simpson之前原來同其他足球員都有來往，而最近喺《太陽報》訪問入面，佢更聲稱自己喺2014年曾經同費蘭尼過咗一晚，但最後因為跌咗個Big Mac（漢堡包）落室內泳池，費蘭尼好嬲所以結束咗嗰次約會。

之不過，費蘭尼似乎對於今次畀Laura Simpson拖落水更加嬲，當呢單新聞喺更多報紙曝光之後，呢位比利國腳星期日喺自己Twitter就出咗個post，話大多數時候佢對有關自己嘅不實報道都唔會出聲，但今日佢受夠同埋已經通知咗佢嘅律師咁話喎，睇吓最後係咪真係會有法律行動啦。