激光劍點煙！大家見過未？電影《星球大戰》入面，激光劍喺絕地武士手上，要嚟救世界對付壞人，咁激光劍喺古惑仔手上又會點呢？就會變咗用嚟點煙同劈友，呢個絕對唔係大家腦入面嘅幻想，而係真正出現喺香港一個導演拍嘅電影上。

講緊嘅就由《關公大戰外星人》嘅導演、G.V.A. Creative嘅Director，梁仲文執導嘅60分鐘電影《香港大師》，電影係以未來嘅香港配合古惑為中心，主角嘅名都係以電影《古惑仔》致敬，好似係陳浩東、豆皮、天狗、雞爺、大大粒等等，惡搞味甚濃，但製作絕對係認真，資金唔多，但要拍出一個未來嘅香港，導演以燈光、剪接、場景、道具方面入手，完美塑造咗一個未來城市。

《香港大師》劇情係講未來嘅香港，有一班過氣嘅古惑仔，因為發生過一件失敗嘅事，而志氣消沉，幾位主角分道揚鑣，各有各嘅生活，而政府就同高科技公司合作收樓計劃，推出鐵頭人計劃，用一個頭盔去強化罪犯，實行政府嘅收樓行動。主角們面對住高科技嘅敵人，搵咗高人「香港大師」幫手，得到咗激光劍等等嘅武器，對抗敵人。

《香港大師》係大陸投資嘅，未來會喺大陸網站有得睇，噚晚香港就有一個機會，有班有心人搞咗個「坎坷影展」，而《香港大師》就係呢個影展嘅閉幕電影，所以觀眾有機會可以睇到，但之後幾時先有得睇呢？《蘋果》問過導演梁仲文，佢就話：「我都想問，呢個要睇監製大佬。」睇嚟真係要「香港大師」出手先幫到手喇。

問到梁仲文導演今次成本有幾多，佢就話大約90萬左右，加埋佢自己親自拎出嚟嘅10萬，大約100萬左右，以科幻片嚟講，真係好低成本。