兩間香港電力公司，賺大錢仲要加電費，俾全港市民聲討，但講到無良，都未夠投資銀行。好似瑞銀（UBS），今年8月聲大大話要全球裁員3500人，但年尾埋單計一計，佢居然係亞太區最賺錢嘅投行。
據金融數據提供商Dealogic統計，由年初至到噚日，UBS喺亞洲賺咗4.93億美金服務費，大概38億港銀，連續8年蟬聯亞太區（除日本外）最賺錢投行。
UBS喺區內市場佔有率4.6%，唔算獨大，至於阿二，就由同樣嚟自瑞士嘅瑞信奪得，賺4.9億美金，市場佔有率4.5%，輸UBS一個馬鼻。
不過，如果以全球市場計，兩間瑞士投行都撼唔贏美資行，摩根大通第三年蟬聯最賺錢投行一哥，今年賺咗55億美金，大概429億港銀。