民主黨劉慧卿同民建聯蔣麗芸，堪稱立法會鐵娘子，事關佢哋鬧起人上嚟都好好火。兩位不同陣營嘅鐵娘子噚日喺一個訪問節目中相遇，各自施展渾身解數爭辯普選，叠聲期間火花處處，但鬧還鬧喎，元秋都不值卿姐至今未獲發還回鄉卡，話要幫佢向中聯辦討回公道，仲聲言要做紅娘，撮合張曉明同卿姐食餐飯㖭呀。
卿姐主持嘅網上節目《議會內外》，噚日請到元秋做嘉賓。八方聽聞，民建聯高層對元秋會接受卿姐訪問都有少少緊張，事前已經向元秋提出溫馨提示，確保佢唔會又因為言論太惹火出事。

爭論普選 叠聲火併

果然，元秋喺節目中雖然同卿姐爭論普選等問題時，繼續以高幾度聲線發言，仲不時同卿姐火併，好多時間都叠聲；但驚人偉論就冇乜嘞，可能費事事後要俾高層照肺啦。
唔知係咪惺惺相惜，元秋似乎對卿姐至今未獲發回鄉卡深表同情，仲質疑點解中央唔畀回鄉卡佢，聲言：「我有權嘅話，一定畀你。」卿姐聽到真係唔知好嬲定好笑嘞，事關佢真係冇權嘛！下巴輕輕講完又如何呢？
結果元秋突然拍心口，話要幫卿姐出頭。點幫法？原來係話代佢向西環問吓，仲乜嘢唔畀番個回鄉卡佢咁衰。講講吓仲話呀，會約中聯辦主任張曉明同卿姐食餐飯交流吓，卿姐聽完都好禮貌咁話「好㗎」。入過中聯辦，卿姐仲唔怕黑咩？仲肯赴會，莫非卿姐會錯意係同黃曉明食飯？

mailto:[email protected]