香港電影導演會周年晚宴今晚喺尖沙嘴文化中心音樂廳舉行，出席者暫時有導演會會長劉偉強、今日連出三個活動嘅任賢齊，仲有趙薇、出爐亞洲電影大獎影帝古天樂、亞洲電影大獎終身成就獎張艾嘉、吳君如、陳可辛、吳鎮宇、余安安、薛凱琪、宣萱、劉浩龍、葉童、惠英紅、溫碧霞等等。今晚會頒8個獎，包括：新晉導演、最佳新演員、榮譽大獎、最佳男女主角、最佳電影、最佳導演及傑出專業貢獻獎。

劉偉強受訪時說：「今朝十點就到場做指揮，搬搬抬抬咁啦！今年爆晒棚，往年開30至32圍，今年開38圍，希望下年請更多唔同工種嘅電影人、演員，大家一齊聚會，上台講吓苦與樂，工作嘅困難處，好似林超賢部《紅海行動》，攞咗中國賀歲票房冠軍，大家可以傾下。」

講到林家棟想幾個屬會一齊搞春茗，劉偉強話：「我都想嘅，之前同古仔（古天樂）、家棟講過，以前十大屬會，o依家變成十一大屬會，對上嗰次一齊搞春茗，已經係十幾年前。但個活動都好似搞金像獎咁，好多嘢要籌備，呢個都籌備咗大半年。今年主題係『電影是我愛的根源』，總之唔係食餐飯咁簡單。」

戴住橙色太陽眼鏡、好鬼型嘅任賢齊就猛嗌膝頭好痠痛，因為頭先要出席兩個活動，又要跑山又要踩單車。嚟緊小齊又有排忙，事關佢下月開戲，台灣取景，依家先同導演開會，預計要拍半年，而且唔會只係stay喺台灣，因為前期功夫比較多，所以都要周圍飛。

除咗呢部之外，小齊仲有部新片，名為《沉默的證人》，荷李活導演Renny Harlin執導，張家輝亦有份主演。小齊謂知道預告片推出外間反應好好，應八月上映：「我都好想睇呀！荷李活嘅拍攝方式真係好唔同，個story board精準好多，每場戲有乜嘢效果都有計算，而且好講求節奏，但我就未睇過完整版。」仲話聽聞該片賣埠成績非常不錯，而且部戲雖然係荷李活導演執導，但一半以上嘅工作人員都係香港人。