埋首創科工作嘅前財政司司長曾俊華，今晚上咗港台節目《大學問》。無見一排，估唔到佢講嘢比之前又開放咗，佢幾位前上司例如全國政協副主席梁振英、特首林鄭月娥同埋新民黨葉劉淑儀都被佢串盡。

上得《大學問》就預咗好多青年人問問題。曾俊華幾乎有問必答，答必幽默，好似有位青年人問佢點首咩歌畀689同娥特好，曾俊華諗咗陣就話，佢而家做DJ就成日播60、70年代嘅歌，點畀兩位就揀近期啲嘅、佢孫女都成日唱嘅《Let It Go》。好一首《Let It Go》，曾俊華想689同娥特let啲咩go呢？只有佢自己先知。

跟住又有青年問曾俊華會唔會再出番嚟選。你估曾俊華係689咩？佢話第一次參選係有啲熱情同埋期望咁去做，再嚟就係「撼頭埋牆」﹗做主持嘅前曾俊華政助羅永聰果然轉數快，即刻搬咗葉劉出嚟。無乜包袱嘅曾俊華亦幽葉劉一默話「有啲人個頭係硬啲嘅」。

咁又係呀，參選就實會畀人篤㗎喇﹗曾俊華都被人篤過佢開行會嘅時候唔出聲，掛住劃公仔啦。有青年人問番呢件事，曾俊華直認自己係鍾意劃公仔，仲要係鍾意劃啲訓覺嘅人，言下之意係咪有人開行會訓覺先？然後曾俊華又解釋，啲政策上行會前，喺政府內傾過十幾廿次，若果佢喺行會先有嘢講就奇怪咯﹗

之後阿聰再發功，話傘運發生嘅時候，曾俊華嘅反應比較冷靜，係咪同佢經歷過70年代嘅美國有關。曾俊華好直接就話「其實(傘運)都唔係咁大件事」，正如70年代佢喺美國經歷過街上好多示威、又出動催淚彈、學校要提早放假畀學生走嘅時代，跟住佢仲自爆「我都佔領過校長室」。阿聰聽到即時爆笑話「你終於都認啦﹗」。

講番嚴肅啲嘅嘢，有啱啱好97年出世嘅同學仔問留唔留喺香港好？曾俊華話，既然有懸念咪試下走咯，反正年青人大把日子，話唔定走咗有其他際遇呢。

至於講番金融科技，曾俊華亦透露一啲不為人知嘅事。講起現時唔少人問起，點解香港唔做電子支付嘅問題，佢話其實香港10年前就做到，不過佢考慮嘅係私隱問題，因為當年就推電子支付，用家嘅所有行為差不多冇晒私隱，甚至落一個要求仲可以準確預測埋用家嘅行為，直至而家有區塊鏈先唔同，私隱度高好多。一句講晒，日久見人心咯。