惠英紅主演電影《血觀音》在台灣奪金馬影后，電影在香港上映，噚晚在銅鑼灣jp戲院舉行首映禮，小紅姐和電影導演楊雅喆一齊主持儀式。最驚喜意想不到係男神張孝全突然出現，送花祝賀小紅姐，仲話：「之前在台灣沒有機會恭賀，希望大家會支持電影。」男神和金馬影后在枱上一齊同大家見面。

小紅姐透露香港上映電影會用返國語一刀不剪，都有少少擔心，台灣票房上映12日收六千萬(台幣)，打破近年幾兩年票房紀錄，希望香港成績都可以拉近。小紅姐慶祝活動仍未完結，完成手頭上拍攝電影再會有慶祝儀式，不過近日拍電影日夜更捱得好辛苦，12月只得兩日休息，要去澳門出席頒獎禮同埋幫fox電視劇宣傳，聖誕節又會去咗內地工作。

小紅姐今年獎項豐收，豬籠入水，有加價空間，小紅姐話：「呢啲唔理，有公司去傾，其實一路以嚟工作都係之前傾落，新工作要去到明年中打後，到時如果我要加價已經過咗氣啦，我唔會咁市儈嘅。」

小紅姐話同張孝全雖未合作過但都相熟，因為孝全同《血觀音》電影導演好熟，電影拍好後都係孝全睇先過佢。有望同男神合作？小紅姐話：「冇所謂，不過我諗都係做佢阿媽或者家姐，人哋三十幾咋，點樣同我演姊弟戀呀，我都怕尷尬，一尷尬就點搞呢，做對手戲唔到喇，要咩角色同故仔令到觀眾會睇先係最緊要。」雖然男神當前，但小紅姐好堅決話現實細過我就唔得啦，我好保守，做朋友係好好。

更多娛聞，喺晒《娛果》
http://fb.com/appledailyent