股海實戰錄:市勢偏軟 有胡要食

蘋果日報 2002/04/09 00:00


中東局勢唔明朗,大戶沽貨有藉口。港股噚日跌107點,收10723。雖然恒指勉強撐住10700收市,但形勢都係利淡居多,下試10400機會相當高。
噚日睇住和黃(013)喺66.50元附近掙扎,睇樣可能守唔住,當機立斷於0.435元沽出和黃Call輪9110止蝕,果然和黃尾市跌落66元收市。如果恒指下試10400,和黃有機試64元,到時再撈番9110博反彈都未遲。

重鋼伺機套利
國企股逆市造好,重鋼(1053)亦如所料上試1.18元阻力位,尾市買盤力度唔錯,守喺平均價1.18元收市。玩開中資股嘅讀者都知道佢哋嘅特性係升得急時亦退得快,所以趙飛雲定下3個方案:如果重鋼今日破位向上,升至1.25元會考慮套利;如未到1.25元已受阻回頭,則以1.18元止賺;假如不幸先回頭,以1.15元作計數位。
佑威(627)噚日平收0.74元,曾諗過喺0.73元補番5萬股,不過考慮到港股有機會跌穿10700,所以暫時忍忍手,今日如見到回落至0.72元或以下,將買多5萬股。短線計數位定喺0.69元。
趙飛雲