一連20場的劉德華「My Love Andy Lau劉德華World Tour」，今日唱到第14場。不過開場未夠一個鐘，半天吊喺紅館準備繼續表演嘅華仔，忽然宣佈因為「聲沙」要腰斬今晚嘅騷，華仔仲因為失望而落淚，得到唔少fans支持。打波先嚟落雨，喺香港演唱會時有發生，唱歌失聲係歌手大忌，就連經驗豐富嘅小鳳姐都試過出事，要腰斬表演。

05年久休復出嘅徐小鳳喺紅館唱到第7場時，因為聲沙同身體不適，唱到中途要腰斬表演，之後另定日子在紅館補開一場。07年張學友喺紅館舉行一連18場名為「光年世界巡迴香港演唱會」，學友因為重感冒失聲，要取消臨尾兩場，學友要馬上開記者會公開道歉。

演唱會腰斬難受，亦有人選擇繼續唱下去，天后鄭秀文（Sammi）16年喺紅館舉行「鄭秀文 Touch Mi 2 世界巡迴演唱會 2016」，頭場已經聲沙走音，到尾聲Sammi忍唔住話：「我好痛苦。我仲有七場，可唔可以退錢畀你哋？我把歌唱成咁，我好痛苦，可唔可以退錢？」最後Sammi堅持完成整個演出。另外，早喺10年陳奕迅亦有類似經驗，佢喺紅館開18場演唱會。因感冒並受空氣污染影響聲沙，開騷前要注射類固醇針開聲，但把聲依然既拆且沙。

精選娛聞，喺晒《娛果》
http://fb.com/appledailyent