見習生巫顯東剛周末（3日）先後有「美麗日子」及「大武士」出唔到閘，一起步已經搣飛，其實小巫對上一次谷草夜馬尾場，小巫騎閘前賭到著格的「綫路勇駒」亦是起步老虎跳輸一條街。

根據賽後報告，該三駒在閘廂內均不規矩，當然有機會是巫顯東當黑，騎正三隻臭馬，但亦不排除與騎者在閘內，安撫馬匹情緒時出了問題。不過看賽後報告，小組的研究重點則似在馬不在人！

現階段要捧巫顯東騎頭場「友歡笑」這類要擺前走的熱門，出閘一刻隨時已定生死，還是要多一份風險意識。

提到出閘差累事，第四場「勇者勝」可算是最佳教材，前仗該駒已於谷草交出22秒5快拉士後追一段，所以上仗由史卓豐換潘頓兼抽一檔再跑同程，自然落到五倍唔夠。

「勇者勝」最後在閘內發脾氣起步慢半拍，遇上步速慢難追之餘，直路還要掟出當晚不太利追的外疊，能照舊交22秒5拉士，追到輸唔夠一個馬位，整體表現較之前一仗再有進步，今次「勇者勝」有運再抽二檔，起步不再執輸的話，應可打開勝利之門。