「香港股神」李四叔原先估計，恒生指數農曆年見三萬點，不過大市升勢銳不可當，十月未過三萬點已經被攻破。雖然四叔曾叫大家小心，仲話考慮喺三萬時減持港股。不過上個禮拜，四叔攞大紫荊勳章，可能人旺帶旺埋港股，四叔不忘調高預測目標，估恒指聖誕後見三萬三，仲話：「預測08年係豐收籌年，香港投資氣氛良好。」
四叔仲提醒散戶趁低吸納，新一份「四叔買股名單」，由原來水蛇春咁長進一步昇華，特別睇好7隻股，其中必吸兩隻愛股係國壽（2628），同畢菲特沽咗嘅中石油（857），另外仲有中國神華（1088）、招商銀行（3968），至於另外3隻都係大陸地產股，包括碧桂園（2007）、中國海外（688）同富力地產（2777），不過四叔話睇定有冇宏調先買。

兆基財經3年升3倍

「香港股神」當然唔係浪得虛名，論往績，四叔04年私人斥資500億銀成立嘅兆基財經，最新成績已經突破2000億，短短三年升咗三倍，跑贏晒恒指。
其實，過去幾年四叔一直係股市大好友，不過，薑始終都係老嘅辣，經歷過風浪，自然知小心駛得萬年船，所以佢老人家今個月中曾經提醒股民，恒指三萬點要小心，佢都會考慮沽貨減持。不過，恒指兩度挑戰三萬不果後，上星期五一舉破位，四叔都因應形勢講番佢嘅最新策略：「重要啲股唔會減，減啲係濕濕碎嘅股。」