丹楓控股（271）唔計增值前嘅折讓，已經流口水，抵搞。丹楓最新NAV 3.43元，現價（1.11元）折讓近70%，已經好吸引。呢期新QE又出籠，資產升值情況持續，港府雖推新樓市降溫措施，但土地供應僧多粥少，而丹楓透過聯營揸住嘅工貿大廈可塑性高，增值潛力可以好爆炸。以應佔樓面每方呎升值1000蚊計數，已經可以額外增值/獲利4億銀。
再講，丹楓揸住港島傳統豪宅區紅山半島物業，亦好重秤，應佔權益市值上到28億銀，丹楓家陣市值幾多？13億銀咁大把。項目嘅潛在變現，好肥仔！丹楓呢期橫行唞氣，平均線已經叠埋一齊，博爆邊向上，翻半番到1.66元，折讓仲有52%，實情仲有大把向上空間。

中國數碼煲冷灶

上星期20大升幅榜中，仙士、粒臣股佔咗18家，資金起哄買細價嘢，昅實中國數碼信息（250）。原因之一，係互控嘅南海控股（680）EGM通過出售項目，估獲收益9億銀，中國數碼受惠。二則，集團嘅NAV折讓高達69%，而南海講緊得32%。冷灶短打中國數碼，博升20%到3.5仙，未有耐上到NAV 9仙。

錢雋