童星出身嘅18歲韓國女星金裕貞，前年拍完《雲畫的月光》後，原定於今年以JTBC新劇《先熱情的打掃吧》回歸公仔箱，但佢今年2月被診斷患上甲狀腺機能低下症，更嚴重到需要進行甲狀腺手術，要停工休養，導致《先熱情的打掃吧》延播。

而休息咗一段時間嘅金裕貞，噚晚於Instagram更新自己嘅近況，寫道：「好耐冇同大家打招呼喇，我最近一直為咗身體健康而努力，感謝一直以來等待我、為我加油嘅人，同埋真係好感謝等待我嘅《先熱情的打掃吧》劇組。我會通過劇集《先熱情的打掃吧》畀粉絲見到一個健康、更好嘅我。仲有，恭喜今日所有迎來成年日嘅人，亦要感謝所有恭喜我嘅人，我會努力成為更好嘅人。」

更多韓流，喺晒《娛果》
http://fb.com/appledailyent