曾演出韓劇《嫉妒的化身》嘅32歲女星徐智慧，今日被爆撻着35歲嘅棒球手尹盛桓，據韓媒報道指兩人本年初透過朋友介紹而認識，近日開始交往。據知雖然徐智慧上月演出綜藝節目《人生酒家》時表示「目前冇男朋友」，但係為咗保護戀情而講大話；報道又指兩人曾被目擊孖模特兒韓惠珍、棒球手車允燦(音譯)情侶double date。不過及後徐智慧所屬事務所就急急否認戀情，表示報道係誤報。

另外，資深主持人李敬揆嘅23歲囡囡李藝琳(音譯)，被發現Instagram不時有跟24歲足球選手金英贊嘅合照，繼而爆出拍拖一說，及後兩人亦大方承認戀情，至於老竇李敬揆方面就表示「無可奉告」。