阿里巴巴創辦人馬雲與騰訊（700）老闆馬化騰鬥到七彩，手機通訊平台、手遊、電子商貿，通通鬥一番，明日年初一，兩馬當然唔放過農曆新年呢個搶客檔期。馬雲出招吸客，以內地手機號碼登錄嘅「來往」用戶，發賀年短訊隨時有機會獲得支付寶紅包，最少5元（人民幣．下同)，最多有1,888元。
阿里近日拎出1,000萬元做紅包，鼓勵大家用旗下手機通訊平台「來往」拜年，本周二至下月5號，朋友間互相傳送祝福語，就有機會中獎。

只能用於淘寶購物

紅包有七款，用淘寶戶口登錄嘅，有機會中到5元、10元、20元、50元、100元、1,888元支付寶紅包；用手機號碼登錄嘅，就可能中到手機充值紅包20元。粗略計算，除開千萬元，來往最多可派5,300個1,888元紅包。
但話明支付寶紅包，啲錢不能提現，仲限定於下月7號至28號，主要喺淘寶或天貓購物。換言之，啲錢最終都係去番馬雲度，如果中得10元、20元，分分鐘因買貴嘢使多咗㖭呀。
來往舊年9月設立，用戶人數過千萬，但比起騰訊旗下微信6億用戶，真係蚊髀同牛髀，難怪馬雲要急起直追，設立來往不久就要求每名員工搵100個街外朋友用來往。馬雲近月又開「馬雲扎堆」（類似專頁），好勤力貼文，想吸引多啲人用來往睇佢有乜金句，唔知新年呢個派紅包活動吸到幾多客呢？

李華華
mailto:[email protected]