韓國女團少女時代（少時）隊長泰妍，近日發行最新專輯回歸樂壇，而佢都不時喺Instagram上載新碟嘅靚相，幫自己做吓宣傳，不過日前佢喺Ig嘅留言就因為串錯字引起網民關注。

泰妍日前上載到Ig嘅相配上留言：「SummerBabys」，不過就被網民指出佢串錯字，網民指英文「Baby」嘅眾數應該係「Babies」，又稱英文雖然唔係泰妍嘅母語，但作為一個公眾人物應該要留意，同埋咁簡單嘅語法都用錯令人覺得遺憾。不過無獨有偶嘅係，於美國出身、同屬少時成員嘅Tiffany曾犯同樣嘅錯，早於去年10月左右，Tiffany上載到Ig嘅一張相中，同樣將「Babies」寫成「Babys」。

不過網民對呢件事就有唔同嘅睇法，有啲人認為：「雖然唔可以話係特別無知，但唔明點解一定要用英文留言，寫錯咗幾冇臉！」但就有網民覺得呢件事唔值得拎出嚟畀人鬧。

另外，Tiffany有份出演嘅綜藝節目《姐姐們的SlamDunk》中，佢同閔孝琳、Jessi等人組成女團出新歌，而製作組今日就公開咗歌曲嘅封面相，大行性感路線。