陳敏之、Cara G.同楊洛婷等，今日喺金鐘出席奶粉品牌活動，敏之話一歲多嘅囝囝正在學行，仲話囝囝生得好高大，大力兼健碩，成個長人咁，人仔細細就好似3、4歲嘅小朋友咁，感性嘅敏之仲話一聲到個仔叫媽媽就暈晒浪，工作幾辛苦都唔記得晒。

提到大台頒獎禮失落女配角獎，問到敏之有冇失望？佢話：「其實我冇，好多人都問我，有提名我都有信心嘅，但冇諗過係我攞，喺2011年我攞過，應該畀未攞過嘅當做鼓勵，鼓勵我都需要，但我覺得自己應該努力鑽研演技，向女主角進發，咁會適合我，有獎係錦上添花。我之前tip淑敏攞嘅，我有祝福佢，每個人都畀心機下好多苦功。」

不過講到《溏心風暴3》捧蛋，敏之就大嘆失望，佢話：「一個獎都冇呢個好失望，我希望係攞最佳劇集，我嘅角色或者其他人都希望攞到一個，唔緊要啦，對手好強，獎得咁多好難嘅，對我嚟講新一年更有推動力，拍多啲好劇。」

另外，楊洛婷自爆生完之後肚皮鬆，o依家開始努力運動收身，今年完成手頭上嘅工作計劃就會再追多個，提到楊爸爸上個月喺加大拿做咗換心同換腎手術，佢話：「好感恩，好難得一次過有心同腎可以同時換到，亦都好難搵到合適，今次係嚟自同一個人，做手術嗰日係細佬個女滿月，又係我囡囡嘅100日，呢份係最好嘅禮物，初時都擔心醒後有排斥，但o依家兩個禮拜都冇發生，真係非常高興，佢仲同89歲嘅嫲嫲慶祝生日。」

最港電影大獎投票網址
http://bit.ly/thekongestfilmawards

精選娛聞，喺晒《娛果》
http://fb.com/appledailyent