日前，筆者走去「機場」同班Sales八吓料，點知發現近期Hit爆嘅903SH又有新聞！據講，11月返貨呢批日版903SH，原來又再俾日本Vodafone重新Lock機，雖然改機佬話有得「搞」，但據一位買咗呢批貨嘅用家講，Hang機情況非常嚴重，甚至已到咗不能接受嘅警戒線！
自從11月初出現「完美解鎖」以嚟，903SH一直走勢強勁，唔單止機價企穩$3,500，就連W900i、N70都唔夠佢紅！不過，近日903SH竟分別出現咗兩批貨，據稱，第一批係來自11月之前，亦即係改機佬講所謂「完美解鎖」嗰批；至於第二批，則屬於11月之後返貨嘅「新版」。據一名受害買家描述，佢買嘅係第二批貨，雖然SIMLock已解，而且聽歌、影相亦運作正常，但係講講吓電話會經常Hang機，情況已嚴重到不能接受！有Sales話，由於呢批「新版」又再俾日本Vodafone上鎖，改機佬暫時只能夠解除SIMLock部份，但係Hang機問題始終未獲得解決；加上舊嗰批903SH已經買少見少，據聞機價已升番上$3,800！筆者建議各位，假如有心買903SH嘅話，記得問清楚有冇以上問題喇！

記者：尹謹基