早前有傳周慧敏（Vivian）難忍花弗男友倪震背住佢同24歲嘅女模Esther撐枱腳，令兩人18年嘅感情亮起紅燈。噚日Vivian出席美容活動宣傳時，首度開腔力證同倪震嘅感情冇變，佢力撐倪震係一個稱職嘅男友，仲承認當初兩人相識時有唔少狂蜂浪蝶埋身，但經過相處之後，明白到對方好重要，所以其他人都冇位行入佢哋嘅關係。

Vivian對感情事有問必答，佢話：「炒作新聞層出不窮，所有分手、箍煲、搬屋都係虛構。呢啲傳聞對自己冇乜影響，反而我另一半、佢父母就成日俾人跟，好彩佢哋好體諒。」Vivian話同倪震互相信任，佢話：「我都同男士出街啦，呢啲係正常社交，佢唔使同我交代，因為信任係好緊要。」
另外，倪匡噚日出席港台活動，佢一見記者就笑騎騎話：「我知你哋問乜嘢啦。」然後滔滔不絕力撐乖仔倪震唔花心，倪匡話：「佢點算花心，如果同女仔去街係花心，呢個世界冇唔花心嘅男人。」問佢想唔想飲新抱茶，佢話：「我想做好多嘢都未必有用，倪震40幾歲，唔係4歲呀。」