《蘋果》財經版〈職場慧眼〉專欄作家張慧敏，昨天大談曾蔭權接受富商招待坐豪華遊艇私人飛機遊澳門和布吉事件，覺得曾蔭權不但冇做錯，而且還十分盡責。「……做了這麼多年高官，結識到非富則貴的朋友有甚麼出奇？應酬商賈大孖沙，以爭取他們對政府各項施政的支持，可是他重要職責。」她寫道。
沙膽虹心諗，自己入傳媒這行近三十年，當總編輯都十幾年，都認識不少大孖沙和大炒家，而且爭取他們提供多些獨家料，亦是沙膽虹重要職責。你估如果沙膽虹好像曾蔭權般接受大孖沙咁樣招待，肥佬黎會否覺得沙膽虹好盡責？梗係唔會啦！唔即炒才奇怪！
如果以這種論調去解釋這些行為，若非狡辯，就是自己呃自己，讓自己有繼續沉淪的藉口。即使第一次接受招待是純粹為了職責，久而久之，界線就模糊，萬一再遇到自己失意或有一刻的軟弱，就可能鑄成大錯，就此玩完。墮落不是一瞬間的事，而是像下樓梯般一步一步的。沙膽虹凡人一個，絕對不敢向高難度挑戰，不敢坐順風遊艇、搭順風私人飛機、食順風鮑魚、飲順風紅酒、住順風豪宅……莫非曾蔭權是聖人？沙膽虹就唔相信！
見到曾蔭權站在富商遊艇上那副得意的樣子，沙膽虹真覺得這個人怎麼膚淺成咁，坐吓豪華遊艇都飄飄然！搞到自己變成咗富商條！
沙膽虹