賭王率先吹雞，合和胡應湘嗱嗱聲跟住落注，學舌大擦當奴曾，又話佢有九十分，可以做特首！
嘩，乜壽爺澳門一握手，真係如有神助？搞到呢兩日，全個中環已經好似唔係當奴做唔做特首嘅問題，而係邊個會陪跑嘅問題！
既然賭王經已第一個霸咗頭位，其他富豪想擦鞋，與其執賭王口水尾獻媚，不如自己報名陪跑，促成當奴好好睇睇咁做皇帝！
當然，當奴若然係由壽爺親自欽點，自己又參選，咁咪即是反華反共、反胡反黨中央？梗係唔係喇！只要參選時發表宣言話：「細佬今日又參選特首，查實無意威脅曾爺，只不過想跟曾爺學吓嘢，因為同曾爺一齊參選，同佢一齊企埋一個platform，呼吸同一樣嘅空氣，係細佬我一生最光榮嘅時刻，所以我參選特首，唔代表想當選，只不過協助曾爺，令佢可以喺一場民主選舉之中體面得勝，等到啲民主派同外國勢力冇聲出！」