【新增回應】

是非纏身的小巨肺Celine爸爸譚順生（自稱Dr Steve），由被指利用個女做「搖錢樹」到俾家燕媽媽公開指摘不顧行規搶學生而且學費仲萬萬聲，跟手再被爆個人得獎成績表與事實不符及刻薄員工等等，是非一籮籮。

之前接受訪問稱女兒Celine日日7點起身練歌，一星期練廿個鐘嘅Dr Steve，今早6時半左右﹐父女搭機返港。原定於A閘出閘，Steve突然改為B閘出，未知是否為避傳媒兜個大圈。有一名男子接機。

行色匆匆的Steve見走唔甩，即大耍太極，對於種種提問，如是否已致電向家燕姐道歉、及是否已如聲明承諾捐出約8萬元學費作善事等全不回應，只道：「個女要趕返學呀！唔講住喇！我個女好鍾意返學㗎！」一落機就要返學？咁今朝練咗歌未？

問Celine妹妹稍後計劃於《全美一叮》選唱甚麼歌？Steve即代女搶答：「呢啲唔可以講㗎，簽咗保密協議。總之揀咗廿幾隻歌啦。」未知Steve是否留待周日宣傳自己新碟時先至一次過回應傳聞啦。

老闆蕭定一今日接受《蘋果》訪問，佢話：「我諗佢嘅嘢我唔係好了解，等佢回應好啲，希望佢星期日出嚟嘅時候，可以一次過回應！」