日本國民級組合SMAP即將解散，現時除咗除夕舉行嘅《紅白歌唱大賽》仲未落實SMAP五子會唔會亮相，今日就有傳連下星期播放嘅最後一集《SMAP×SMAP》會唔會齊人演出仍然係未知之數。

富士電視台長壽王牌節目《SMAP×SMAP》將會喺下星期一播出最後一集，屆時會以5小時直播節目形式播出，希望將播出逾過20年嘅《SMAP×SMAP》為粉絲為下美好回憶，現時距離節目播出只淨4日，不過今日有日本傳媒報道富士仍為《SMAP×SMAP》與五位成員交涉，當中香取慎吾唔想再以SMAP成員身份亮相節目，以同佢嘅談判最為困難，令電視台相當頭痕，最壞情況可能要取消直播演出。

而SMAP嘅最後一張精選碟《SMAP 25 YEARS》剛推出，首批出貨量達至80萬張，唔少店舖已賣斷市，要追加12萬張出量，料唱片會成為今年日本唯一一張銷量破100萬張嘅大碟。

SMAP解散消息震驚全球唔少粉絲，國際知名音樂大師坂本龍一噚日喺東京出席萬寶龍國際藝術贊助大獎時，亦被問及對SMAP解散嘅感想，點知坂本龍一聽到後露出一臉驚訝嘅神情，原來佢話好少留意日本新聞，唔知道SMAP解散。