今時唔同往日，班賓架以前生意唔憂做，可以高高在上等人上門，家吓就梗冇呢支歌仔唱啦，仲要大庭廣眾俾人串唔識去敲人門！所以𠵱家大賓架日日都要拋頭露面，放下身段，幫銀行搞形象做推廣，喺花旗做咗26年嘅TC陳子政，就體驗晒做賓架嘅高低潮。
陳子政上個月28號先同班大學生真情對話，第2日已經飛咗去台北，捧當地鞋王寶成集團蔡其瑞嘅場，真係奔波勞碌。
佢同班大學生哥講，做人唔止要workhard，仲要worksmart，是但做到一樣，都唔算叻；又話要成功就要知己知彼，否則就辛苦兼失敗。
TC話自己最着重工作同生活平衡，唔會一味顧住做嘢，有時都會忙裏偷閒，好似歐聯期間佢都會三更半夜起身，捧吓阿仙奴，仲話自己每日瞓6個鐘就夠，只係個樣天生係咁，先俾人覺得好似唔夠瞓。

初入行唔知信用狀係乜

喺美國讀會計出身嘅TC，畢業後幾份工爭住請佢，最終揀咗入花旗做練習生，估唔到一做就廿幾年。佢話最初連信用狀係乜都唔知，又同過滿口粗言嘅人共事，加上做呢行，成日對住啲錢，一定唔可以出錯，壓力不知幾大，但撐得過就可以賺到好多經驗。
喺同一集團做咗咁耐，佢話冇諗過轉工就呃你，不過最終都冇走到，點解？人工吸引，兼且有機會升上管理層之外，佢呢廿幾年嚟，每隔幾年就轉做唔同工種，香港以外，駐守過台灣及日本，基本上同轉工都冇乜分別，所以咪一直留到家吓囉。
李華華

讀者如有任何意見或報料，歡迎發送電郵至[email protected]。