【新增影片】

3,000萬鎊（3億港元）買個降班隊門將，貴唔貴就見仁見智，但愛華頓睇完周五呢場U21歐洲國家盃揭幕戰，肯定覺得抵番晒！周五U21歐國盃A組賽事，兩支外圍賽不敗之師交鋒，英格蘭U21憑啱啱以3,000萬鎊由新特蘭加盟「拖肥」嘅門將比克福特救出12碼，同瑞典U21互交白卷，僥倖搶番一分！

「幼獅」近排氣勢如虹，連贏土倫盃同世青盃，但呢支擁有唔少熟悉面孔，包括大國腳禾特普斯同列特文、車路士中場查洛巴、阿仙奴守將哥林張伯斯等嘅U21，首戰表現可謂乏善足陳，面對上屆冠軍瑞典U21未佔甜頭。瑞典下半場先有馬模前鋒施比斯基射中柱，英格蘭亦有李斯特城嘅捷維爾遠射省中人改變方向中楣，但呢位「狐狸」守將喺80分鐘禁區內不智鏟低對手右閘華爾基斯，球證直指12碼，好彩23歲嘅比克福特「企定定喺度」救出華爾基斯射中間嘅12碼，為英格蘭力保0:0和局。

同組另一場，主場出擊嘅波蘭U21開波53秒就開紀錄，但最終俾斯洛伐克U21反勝2:1完場；全取3分嘅斯洛伐克，下周一次輪分組賽將會對英格蘭，波蘭就會對瑞典。