農夫嘅鄭詩君（C君）同DJ女友黃天頤拍拖3年，感情穩定，近年發展唔錯嘅C君仲買車租樓，照顧埋女友嘅生活，大家都視對方係將來伴侶，一齊努力朝目標進發，C君已計劃明年娶老婆。

現年34歲嘅C君，同黃天頤交往前，12年曾被舊愛Gloria悔婚，Gloria仲搭上C君好友，搞到C君情緒崩潰。（新聞連結： https://bit.ly/2N9DOjt ）不過皇天不負有心人，C君後嚟遇上現任女友黃天頤，佢哋仲夾，而C君錫女友錫到燶，係絕世好男友。

C君噚日被發現同女友黃天頤十指緊扣拍拖，佢哋仲去咗九展婚紗展，同行仲有另一對男女友人，似乎係對對碰拍拖行婚展，佢哋都逗留咗一段時間，C君仲拎住袋嘢，好有收穫咁。

C君今日接受《蘋果》電話訪問時話：「去婚紗展原因係我朋友就嚟結婚，我亦打算明年同女友結婚，所以咪一齊去，睇下有乜要準備，參詳下有乜嘢要book，例如場地，大概價錢係幾多，獲得好多資訊，又有好多人同你講恭喜，好開心㗎！」

精選娛聞，喺晒《娛果》
http://fb.com/appledailyent