MK Pop始祖E-kids、37歲成員阮民安（Tommy）前年同女友張倚雯奉子成婚，去年更升呢做父母，Tommy嘅囝囝阮治童（Caesar）噚日1歲生日，撞正年初二，Tommy特別為囝囝搞咗生日P兼開年飯，全家人開心慶祝。

Tommy話囝囝係天賜禮物，佢今日接受《蘋果》訪問時話：「囝囝係上天嘅巧妙安排，前年7月，我媽咪離開咗，同時太太就有咗童童，囝囝出世亦都好腳頭，我事業有起色，工作多咗，又開演唱會，我希望做到一個好爸爸，陪住囝囝長大，將過往覺得唔啱嘅嘢同佢分享，等囝囝未來條路容易行好多，佢都開心健康成長。」　

Tommy話以往係幫朋友搞生日會，今年首次幫囝囝搞，又撞正年初二，大頭蝦嘅佢竟然唔記得咗要預早搵場地同訂汽球，Tommy話：「我前一晚初一先搞，點知周圍都冇開，我喺facebook求救，叫大家幫手。」Tommy好鍾意卡通人物《龍珠》嘅孫悟空，所以囝囝生日都用咗佢做主題，用咗橙色同藍色，Tommy一家三日着咗唐裝應節。Tommy話：「我好鍾意孫悟空，希望囝囝似佢咁叻，咁有正義感，同埋有鬥心同男子氣慨。」做咗爸爸嘅Tommy話責任大咗，佢話：「好命我仲有三、四十年陪囝囝玩，我當然希望每年同佢一齊過，但囝囝十幾歲時可能已有自己朋友想一齊玩，過得一年得一年。」

最港電影大獎投票網址
http://bit.ly/thekongestfilmawards

精選娛聞，喺晒《娛果》
http://fb.com/appledailyent