孫慧雪、黎燕珊、張嘉兒三位媽媽今日喺觀塘出席一間公關同推廣公司開幕儀式，阿雪生咗囝囝之後第一年過母親節，原本老公話同佢食飯慶祝，不過病咗，唯有睇下今晚狀況。首年以人母身份過母親節，佢話：「感覺好特別，母親節意義多咗一重，但自己心願都係想BB健康。」囝囝Riley現時九個月大，阿雪話：「曳咗好多，經常用手好大力拍打，我成日教佢要斯文啲，佢已經識得嗌daddy同媽媽，不過因為之前成日嗌媽媽，老公就笑佢係mama's boy，搞到到BB依家唔肯嗌媽媽，乜都只嗌daddy，令到我好唔開心。」

黎燕珊今年首次一個人過母親節，因為囝囝喺英國讀書，囡囡出咗外地公幹，不過阿仔好孝順，珊姐話：「噚晚半夜12點就打電話返香港同我講母親節快樂，身體健康，返嚟同我食飯，聽到之後一個人喺屋企喊咗出嚟。阿女就畫咗一張卡同埋送咗張按摩椅畀我，見到仔女咁乖我覺得自己辛苦都係值得 。」現時囝囝仲未有女朋友，黎燕珊話都好鼓勵佢拍拖，有正常社交，拍拖係好事，亦唔介意佢第日另一半係外國人，最緊要阿仔開心，同埋另一半愛阿仔，並自認係開通媽咪。

精選娛聞，喺晒《娛果》
http://fb.com/appledailyent