吳卓羲10年尾同大陸女藝人張馨予撻着，但拍拖未夠兩年就分手。上個月5日，張馨予喺微博宣佈結咗婚，老公係現役軍官、武警特戰指戰員何捷，之後吳卓羲出席活動時都有向舊愛送上祝福。

吳卓羲自從2012年7月同張馨予分手之後，感情似乎未見有着落。不過，近日網上流傳一張吳卓羲同老友郭政鴻、馬德鐘、戚美珍、苗僑偉等大班朋友慶祝生日嘅相，相中吳卓羲一手着住紅衫攬住個年過30戴cap帽嘅女子，一手豎起手指公，喺生日蛋糕前影大合照，另一張係成班人食飯合照，個cap帽女子正正坐喺吳卓羲隔離，令人懷疑個女仔係吳卓羲新女友。

今日係吳卓羲38歲正日生日，《蘋果》今日打比壽星公，問佢今日正日生日點慶祝時，佢話同屋企人食飯慶祝。問佢日前係咪攬住新女友同鴻仔等人慶生，佢就否認係新女友話頭：「朋友嚟㗎，如果係就唔會登出啦，係咪先，儍㗎咩！」講到佢dry咗咁多年，有新女友都好正常啫，但吳卓羲否認話：「咁唔係女朋友嚟㗎嘛呢個，朋友嚟之嘛，係都唔會登出嚟啦。張相係我哋朋友send出嚟。朋友搭吓冇乜所謂，咁開心。」依家感情生活點？吳卓羲話：「做嘢先啦，邊有時間呀。」

而《蘋果》都有打俾郭政鴻，佢就話係前晚(8月31日)同吳卓羲食生日飯，問嗰個係咪吳卓羲新女友？郭政鴻話：「唔係，朋友嚟㗎咋！」

精選娛聞，喺晒《娛果》
http://fb.com/appledailyent