利物浦後防不濟就係人都知，所以高路普出天價都要買雲迪積克返嚟，希望可以取代洛夫雲呢個炸彈，等佢可以同比較穩健嘅祖爾麥迪比拍住上，減少後防派膠嘅問題。但上半場初段祖爾麥迪比就自爆，喺自己後防送出一個軟弱無力嘅傳波，最終畀李城打反擊導致先失一球。

查實今季利記後防問題多多，但比較多嘅情況係後衛失位或者走漏人，而後防傳失被對手打反擊嘅情況今場就出現咗，而罪魁禍首仲要係成條防線至穩陣嘅祖爾麥迪比。球波雖然係麥迪比傳失，但亦都可以睇到卡利奧斯同後防默契不足，因為佢當時有好多選擇，可以將波大腳踢去前場，但就偏偏傳畀有人逼緊嘅祖爾麥迪比，後者情急之下傳失導致失波。

所以話雲迪積克嘅重要性好高，呢位中堅轉身快、有速度、位置感唔錯，絕對可以畀高路普多一個選擇。之但係咁，踢得掂修咸頓未必代表踢得掂利記，而洛夫雲就係一個好例子。

利記成條後防最好表現嘅，就係左閘安德魯羅拔臣。佢展現出同艾拔圖摩蘭奴嘅分野，前者全場表現活躍，單單喺上半場已經觸球61次，同沙迪奧文尼不時有配合，亦試過獨力殺入禁區逼使敵衛出手攔截，最緊要係冇犯不必要嘅失誤。

值得一提嘅係，羅拔臣同李城嘅哈利馬古尼係侯城嘅舊隊友，後者今場一夫當關，紅軍好多嘅攻勢都畀佢化解咗，高波亦都畀佢頂走晒。馬古尼面對高速嘅沙拿亦不落下風，上半場試過落後對方幾個身位亦能從後追上閂走皮球，證明佢絕非池中物。

好彩嘅係，紅軍前線始終有保證，下半場就靠沙拿包辦兩粒反勝。但後防時不時就自爆，往往前面入埋都唔夠失，希望雲迪積克真係可以帶嚟改變。

文:聰鳴

--------------------
BFB CHAMPIONS 2.0 聖誕新年活動連環出擊，登入即送傳奇球星「林伯特」！ http://bit.ly/2xrTKGM