市面上仍不乏高息股,但要業務同時有睇頭真係可遇不可求,皓天財經(1260)實屬異數!皓天乃本地唯一上市嘅財經公關龍頭,提供財經公關服務外亦籌辦及協調國際路演。截至今年3月底止全年收入上升33%至4.6億銀,盈利亦升24%至1.5億銀。現價市盈率僅8.9倍,以其業務獨特性計,絕對平得交關。講前景,近期新股展開新一輪攻勢,皓天食正條水,而公司主攻內地客戶,未來滬港通開通後,中港股市關係更密切,未來客源肯定更闊更廣,三個字︰冇得輸!
講番重點,皓天上市僅兩年,但中期末期業績均慷慨派息,特別息更係次次有!以去年全年派息0.154元計,現價息率高達6.7厘,名副其實高息股一隻,手頭淨現金達4.9億銀,相當於市值36%,贏晒!如今領匯同置富現價息率分別跌穿4厘及5厘,皓天絕對係換馬嘅好選擇。睇圖表,皓天上市以來呈圓底走勢,現正處於杯柄,一旦突破1.4元,可以升到你唔信。
唐牛
https://www.facebook.com/tongcow88