噚日係已故一代巨星梅艷芳逝世15周年，梅姐歌迷製作咗部電影《朝花夕拾芳華絕代》作為紀念，電影噚晚喺銅鑼灣舉行首映禮，有份主演嘅胡杏兒話：「呢套戲可以話係梅姐嘅一班歌迷，當禮物送番畀梅姐嘅禮物，電影中我演嘅角色，係同梅姐識於微時好朋友。」

其實杏兒家姐都係梅姐嘅超級fans，所以杏兒細細個就已經好留意呢位巨星，可惜係入行時冇機會見過梅姐本人，但今次可以透過電影，加深了解到梅姐嘅重情重義，佢話：「睇到梅姐真係收藏起fans送畀佢嘅禮物、書信，梅姐對我嚟講絕對係學習前輩。」

另外，幾日前去睇劉德華演唱會嘅杏兒，知道華仔最終因病決定取消所有演出，佢話：「我睇嗰場咁啱就係華哥中途決定取消，當時係睇到華哥好落力演出，呢個係個艱難決定，希望佢快啲好番啦！」

精選娛聞，喺晒《娛果》
http://fb.com/appledailyent